O‘zbekistondagi ta’lim muassasalarida arab tilini o‘qitish

“So‘nggi besh yilda Saudiya Arabistoni podshohligi hamda O‘zbekiston Respublikasi turli sohalarda ko‘zga ko‘rinarli yutuqlarga guvoh bo‘lib kelmoqda. Biz taraqqiyotga kamarbasta bo‘lish, hamkorlik, xususan, ta’lim hamda arab tilini o‘qitishni takomillashtirish yo‘lida faoliyat ko‘rsatishga tayyormiz. Bu borada ilm-fan hamda ta’limga doir bitimlarni alohida qayd etish joiz”, – deydi diplomat. Bugun yurtimiz butun dunyo, jumladan, Arab olami bilan siyosiy-iqtisodiy, madaniy-gumanitar robitalarni mustahkamlashga jiddiy e’tibor qaratmoqda. Bu esa arab tilini mukammal o‘zlashtirgan kadrlarga bo‘lgan talabni oshirmoqda. Ma’rifiy tadbir davomida mazkur tilni o‘qitishni yanada takomillashtirish yo‘llari muhokama etilgani ham ana shu hayotiy ehtiyoj bilan izohlanadi. Anjuman doirasida talabalar o‘rtasida arab tilida notiqlik mahorati, ifodali o‘qish va sahna ko‘rinishlari bo‘yicha bellashuv ham o‘tkazildi. Kitoblar taqdimoti, xattotlik namoyishi hamda arab milliy taomlari dasturxoni esa arab madaniyati va tili muhitini yaqindan his qilishga xizmat qildi. Soha mutaxassislariga ko‘ra, zamonaviy O‘zbekistonda arabshunoslikning ilg‘or maktabi shakllangan. Arab tili fani bo‘yicha darslik, qo‘llanma va dasturlar yozilgan. Mazkur til bo‘yicha xalqaro miqyosda tan olingan peshqadam olimlar tarbiyalangan. Masalan, TDShU Arab filologiyasi kafedrasi mudiri, Saudiya Arabistonidagi universitetda ko‘p yillar professor lavozimida faoliyat yuritgan Shorustam Shomusarov Markaziy Osiyo mintaqasidan Butunjahon arab tili ittifoqi markaziy kengashi a’zoligiga saylangan.